மீனாட்சி அம்மன் கோவிலில் ஐப்பசி கோலாட்ட உற்சவம் வருகிற 4-ந்தேதி தொடக்கம்

மதுரை மீனாட்சி அம்மன் கோவிலில் 12 மாதங்களிலும் திருவிழா நடைபெறும். அதில் ஐப்பசி மாத கோலாட்ட உற்சவம் வருகிற 4-ந் தேதி தொடங்கி 9-ந் தேதி வரை நடக்கிறது. விழாவில் தினமும் மீனாட்சி அம்மன் ஆடி வீதியில் வலம் வந்து அம்மன் சன்னதி கொலுச்சாவடியில் காட்சி அளிப்பர். முக்கிய நிகழ்வான கோ ரதத்தில் அம்மன் எழுந்தருளும் நிகழ்ச்சி 6-ந் தேதியும், வெள்ளி ரிஷப வாகனத்தில் காட்சி தரும் நிகழ்ச்சி 9-ந் தேதியும் நடைபெறும்.

மேலும் வருகிற 4-ந் தேதி தீபாவளி பண்டிகை தினத்தன்று காலை, மாலை இருவேளையும் மீனாட்சி அம்மனுக்கு தங்க கவசமும், வைரகிரீடமும், சுந்தரேசுவரர் சுவாமிக்கு வைர நெற்றி பட்டையும் சாற்றுப்படி செய்யப்படும். முன்னதாக ஐப்பசி பூரம் வருகிற 31-ந் தேதி நடக்கிறது. அன்றைய தினம் காலை 10 மணிக்கு மூலவர் மற்றும் உற்சவர் மீனாட்சி அம்மனுக்கு ஏற்றி இறங்குதல் என்னும் சடங்குகள் நடந்து சிறப்பு தீபாராதனைகள் நடைபெறும் என்று கோவில் நிர்வாகம் தெரிவித்துள்ளது.