ஆட்டோமொபைல்
புது பிஎம்டபிள்யூ ஜி சீரிஸ் மாடல்கள் முன்பதிவு விவரம்
பிஎம்டபிள்யூ நிறுவனத்தின் புதிய ஜி 310 ஆர் மற்றும் ஜி 310 ஜிஎஸ் மோட்டார்சைக்கிள் மாடல்களின் முன்பதிவு விவரங்களை பார்ப்போம்.
பிஎம்டபிள்யூ மோட்டராட் நிறுவனம் புதிய ஜி 310 ஆர் மற்றும் ஜி 310 ஜிஎஸ் பிஎஸ்6 மாடல்களின் முன்பதிவை செப்டம்பர் 1 ஆம் தேதி துவங்கும் என தெரிவித்து இருக்கிறது. புதிய மோட்டார்சைக்கிள்கள் ஆன்லைன் அல்லது விற்பனை மையங்களில் நடைபெறும் என தெரிவிக்கப்பட்டு உள்ளது.
புதிய ஜி 310 ஆர் மற்றும் ஜி 310 ஜிஎஸ் பிஎஸ்6 மாடல்களை பெறும் முதல் நாடாக இந்தியா இருக்கிறது. இதன் காரணமாக இரு மாடல்களின் சர்வதேச வெளியீடு விரைவில் நடைபெற இருக்கிறது.
இந்திய சந்தையில் பிஎம்டபிள்யூ ஜி 310 ஆர் மற்றும் ஜி 310 ஜிஎஸ் மாடல்கள் அதிகளவு விற்பனையாகி வந்தது. இந்த நிறுவனத்தின் ஒட்டுமொத்த விற்பனையில் இரு மாடல்கள் மட்டும் 85 சதவீத பங்குகளை கொண்டுள்ளன.
முன்னதாக பிஎம்டபிள்யூ ஜி 310 ஆர் மற்றும் ஜி 310 ஜிஎஸ் பிஎஸ்6 மாடல்கள் இந்தியாவில் சோதனை செய்யப்படும் போது எடுக்கப்பட்ட ஸ்பை படங்கள் இணையத்தில் வெளியாகி இருந்தன. அதன்படி புதிய மாடல்களில் காஸ்மெடிக் மாற்றம் செய்யப்பட இருப்பது தெரியவந்துள்ளது.