பேக்கரி கடை மீது தாக்குதல்- மதுரை தி.மு.க. நிர்வாகி அதிரடி சஸ்பெண்டு

வாடிப்பட்டி:

மதுரை மாவட்டம் வாடிப்பட்டி சந்தை பாலம் அருகில் அ.தி.மு.க. பிரமுகர் சோனை என்பவருக்கு சொந்தமான பேக்கரி உள்ளது. கடந்த 5-ந்தேதி மாலை கத்தி, கம்புடன் இங்கு வந்த சிலர் பேக்கரியின் கண்ணாடி மற்றும் பொருட்களை அடித்து சூறையாடினர்.

இதுபற்றி தகவலறிந்த வாடிப்பட்டி போலீசார் விரைந்து சென்று அவர்களை பிடித்து விசாரித்தனர்.

விசாரணையில் அவர்கள் பொட்டுலுப்பட்டியை சேர்ந்த அசோக்குமார் (வயது28), காட்டுபட்டியை சேர்ந்த அறிவுசெல்வம் (19), சோழவந்தான் பெரியமருது (24) ஆகியோர் என தெரிய வந்தது.

இதுதொடர்பாக போலீசார் அவர்கள் 3 பேரையும் கைது செய்து விசாரணை நடத்தினர். விசாரணையில் கடந்த 3-ந் தேதி போடி நாயக்கன்பட்டியில் நடந்த ஒரு நிகழ்ச்சியில் கலந்து கொள்ள வந்த வாடிப்பட்டி பேரூர் தி.மு.க. செயலாளர் பிரகாசம் என்பவரை, கூட்டுறவு சங்க துணை தலைவர் சோணை மகன் அசோக்குமார் அவமதிப்பு செய்ததாக கூறி 3 பேரும் பேக்கரியை அடித்து சேதப்படுத்தியது தெரிய வந்தது.

இந்த நிலையில் தி.மு.க. பேரூர் செயலாளர் பிரகாசம் தி.மு.க.வில் இருந்து சஸ்பெண்டு செய்யப்பட்டுள்ளார்.

இதுதொடர்பாக தி.மு.க. பொதுச்செயலாளர் துரைமுருகன் வெளியிட்டுள்ள அறிக்கையில் கூறியிருப்பதாவது:-

மதுரை வடக்கு மாவட்டம் வாடிப்பட்டி பேரூர் செயலாளர் பி.பிரகாசம், கழக கட்டுப்பாட்டை மீறியும், கழகத்திற்கு அவப்பெயர் ஏற்படும் வகையிலும் செயல்பட்டு வந்ததால் அடிப்படை உறுப்பினர் உள்ளிட்ட அனைத்து பொறுப்பிலிருந்தும் தற்காலிகமாக நீக்கி (சஸ்பெண்டு) வைக்கப்படுகிறார்.

இவ்வாறு அதில் கூறப்பட்டுள்ளது.