கடலூர் கஜேந்திர வரதராஜ பெருமாள் கோவிலில் திருக்கல்யாண உற்சவம்

கடலூர் புதுக்குப்பத்தில் கஜேந்திர வரதராஜ பெருமாள் கோவில் அமைந்துள்ளது. இக்கோவிலில் வருடந்தோறும் பிரம்மோற்சவம் நடைபெறுவது வழக்கம். அந்த வகையில் இந்த ஆண்டுக்கான பிரம்மோற்சவம் கடந்த 23-ந் தேதி கொடியேற்றத்துடன் தொடங்கியது.

இதையடுத்து 24-ந் தேதி யாக சாலை ஹோமம் மற்றும் திருமஞ்சனமும் நடந்தது. நேற்று மாலை 6 மணிக்கு திருக்கல்யாண உற்சவம் நடைபெற்றது. இதையொட்டி கஜேந்திர வரதராஜ பெருமாள் சிறப்பு அலங்காரத்தில் பக்தர்களுக்கு அருள்பாலித்தார். பின்னர் சாமிக்கு மகா தீபாராதனை காண்பிக்கப்பட்டது. இதில் பக்தர்கள் கலந்து கொண்டு தரிசனம் செய்தனர்.

இன்று (ஞாயிற்றுக்கிழமை) மாலை 6 மணிக்கு புரட்டாசி திருவோண கருடசேவையும், நாளை மறுநாள் (செவ்வாய்க்கிழமை) 1008 சகஸ்ரநாம அர்ச்சனையும், ஊஞ்சல் சேவையும் நடக்கிறது. இதற்கான ஏற்பாடுகளை கோவில் நிர்வாகிகள் மற்றும் பொதுமக்கள் செய்து வருகின்றனர்.