புதிய ஹூண்டாய் ஐ20 முன்பதிவு மற்றும் வெளியீட்டு விவரம்

ஹூண்டாய் நிறுவனம் தனது புதிய தலைமுறை ஐ20 காருக்கான முன்பதிவுகளை துவங்கி உள்ளது. இந்திய சந்தையில் புதிய ஹூண்டாய் ஐ20 மாடலுக்கான முன்பதிவு ஆன்லைனில் நடைபெறுகிறது. முன்பதிவு கட்டணம் ரூ. 21 ஆயிரம் என நிர்ணயம் செய்யப்பட்டு உள்ளது.

ஆன்லைன் மட்டுமின்றி புதிய பிரீமியம் ஹேட்ச்பேக் மாடலுக்கான முன்பதிவு ஹூண்டாய் விற்பனையகங்களிலும் நடைபெறுகிறது. புத்தம் புதிய ஹூண்டாய் ஐ20 ஹேட்ச்பேக் மாடல் இந்தியாவில் நவம்பர் 5 முதல் விற்பனைக்கு வருகிறது. 

புதிய ஹூண்டாய் ஐ20 மாடல் மேக்னா, ஸ்போர்ட்ஸ், ஆஸ்டா மற்றும் ஆஸ்டா (ஒ) என நான்கு வேரியண்ட்களில் கிடைக்கிறது. மேலும் இது 1.2 லிட்டர் பெட்ரோல், 1.5 லிட்டர் டீசல் மற்றும் 1.0 லிட்டர் டர்போ பெட்ரோல் என மூன்றுவித என்ஜின் ஆப்ஷன்களில் கிடைக்கிறது.

இத்துடன் ஒவ்வொரு என்ஜினுக்கு ஏற்ப மேனுவல், இன்டெலிஜன்ட் மேனுவல், இன்டெலிஜன்ட் வேரியபில் டிரான்ஸ்மிஷன் மற்றும் 7 ஸ்பீடு டிசிடி ஆட்டோமேடிக் கியர்பாக்ஸ் போன்ற ஆப்ஷன்களில் கிடைக்கிறது.