ஆஸ்டர் மாடல் விலையை உயர்த்திய எம்.ஜி. மோட்டார்

எம்.ஜி. மோட்டார் நிறுவனத்தின் ஆஸ்டர் மாடல் விலை இந்தியாவில் உயர்த்தப்பட்டது. கடந்த ஆண்டு அக்டோபர் மாதம் ஆஸ்டர் மாடல் ரூ. 9.78 லட்சம், எக்ஸ்-ஷோரூம் துவக்க விலையில் அறிமுகம் செய்யப்பட்டது. தற்போது ஆஸ்டர் மாடலின் விலை ரூ. 35 ஆயிரம் வரை உயர்த்தப்பட்டு இருக்கிறது. 

அதன்படி எம்.ஜி. ஆஸ்டர் எஸ்.யு.வி. விலை தற்போது ரூ. 9.98 லட்சம் என துவங்கி டாப் எண்ட் மாடல் விலை ரூ. 17.73 லட்சம் என மாறி இருக்கிறது. அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு உள்ளது.

எம்.ஜி. ஆஸ்டர் மாடல் இருவித பெட்ரோல் என்ஜின் ஆப்ஷன்களில் கிடைக்கிறது. இதன் 1.5 லிட்டர் பெட்ரோல் என்ஜின் 108.5 பி.ஹெச்.பி. திறன், 144 நியூட்டன் மீட்டர் டார்க் இழுவிசையை வெளிப்படுத்துகிறது. இத்துடன் 1.3 லிட்டர் டர்போசார்ஜ் செய்யப்பட்ட பெட்ரோல் என்ஜின் வழங்கப்படுகிறது. இது 138 பி.ஹெச்.பி. திறன், 220 நியூட்டன் மீட்டர் டார்க் இழுவிசையை வெளிப்படுத்துகிறது.

இதன் 1.5 லிட்டர் என்ஜினுடன் 5 ஸ்பீடு மேனுவல் கியர்பாக்ஸ் அல்லது 8 ஸ்பீடு சி.வி.டி. கியர்பாக்ஸ் பெறலாம். 1.3 லிட்டர் என்ஜினுடன் 6 ஸ்பீடு டார்க் கன்வெர்ட்டர் ஆட்டோமேடிக் கியர்பாக்ஸ் வழங்கப்படுகிறது.