அறந்தாங்கி தொகுதி காங்கிரஸ் வேட்பாளரின் ஆதரவாளர் வாகனத்தில் ரூ.76 ஆயிரம் பறிமுதல் - 3 பேர் கைது

புதுக்கோட்டை:

புதுக்கோட்டை மாவட்டம் அறந்தாங்கி தொகுதியில் தி.மு.க. கூட்டணியில் காங்கிரஸ் கட்சி சார்பில் ராமச்சந்திரன் போட்டியிடுகிறார். இந்த நிலையில் நேற்று அவர் மணமேல்குடி செங்குந்தர்புரத்தில் திறந்த வாகனத்தில் சென்று தீவிர வாக்குசேகரிப்பு பணியில் ஈடுபட்டு இருந்தார்.

அப்போது, வேட்பாளர்களின் ஆதரவாளர்களும் பின்னால் வாகனத்தில் வந்தனர். இந்த நிலையில் தேர்தல் பறக்கும் படை அதிகாரிகள் திடீரென்று வந்து வேட்பாளர் மற்றும் அவரது ஆதரவாளர்கள் வாகனங்களை நிறுத்தி சோதனை நடத்தினர். சோதனையில் வேட்பாளரின் ஆதரவாளர் வாகனத்தில் ரூ.76 ஆயிரத்து 600 இருந்தது தெரியவந்தது. இதனையடுத்து, அதிகாரிகள் பணத்தை பறிமுதல் செய்து, அந்த வாகனத்தில் இருந்த திருச்சியை சேர்ந்த பிரவின்ராஜ், சென்னையை சேர்ந்த குட்டியப்பன், கணேசன் ஆகிய 3 பேரை பிடித்து மணமேல்குடி போலீஸ் நிலையத்தில் ஒப்படைத்தனர்.

இதுதொடர்பாக போலீசார் வழக்குப்பதிவு செய்து 3 பேரையும் கைது செய்தனர். பின்னர் பறிமுதல் செய்யப்பட்ட பணம் அறந்தாங்கி சப்-கலெக்டர் அலுவலகத்தில் ஒப்படைக்கப்பட்டது.