செய்திகள்
கோப்புப்படம்

காஷ்மீரில் 2 பயங்கரவாதிகள் சுட்டுக்கொலை

Published On 2021-07-23 10:22 GMT   |   Update On 2021-07-23 10:22 GMT
காஷ்மீரில் பாதுகாப்பு படையினர் நடத்திய அதிரடி வேட்டைகளில் இதுவரை சுமார் 80 பயங்கரவாதிகள் சுட்டுக்கொல்லப்பட்டு இருப்பது குறிப்பிடத்தக்கது.
ஸ்ரீநகர்:

காஷ்மீர் மாநிலம் பாரமுல்லா மாவட்டத்தில் உள்ள வனப்பகுதியில் பயங்கரவாதிகள் பதுங்கி இருப்பதாக பாதுகாப்பு படையினருக்கு ரகசிய தகவல் கிடைத்தது.

இதையடுத்து பாதுகாப்பு படை வீரர்கள் வார்போரா என்ற இடத்தில் முற்றுகையிட்டு சோதனை நடத்தினார்கள். வனப்பகுதியில் உள்ள ஒவ்வொரு வீடுகளுக்கும் சென்று ஆய்வு செய்தனர்.

அப்போது ஒரு வீட்டுக்குள் 2 பயங்கரவாதிகள் பதுங்கி இருப்பது தெரியவந்தது. அவர்களை சரணடையுமாறு பாதுகாப்பு படையினர் எச்சரித்தனர். ஆனால் பயங்கரவாதிகள் சரணடைய மறுத்துவிட்டனர்.

திடீரென பயங்கரவாதிகள் தரப்பில் இருந்து சரமாரியாக சுட்டனர். இதனால் இரு தரப்பினருக்கும் இடையே கடுமையான துப்பாக்கி சண்டை ஏற்பட்டது. இன்று அதிகாலைவரை துப்பாக்கி சூடு நீடித்தது.

பயங்கரவாதிகள் ஒருகட்டத்தில் தப்பி செல்ல முயன்றனர். அப்போது பாதுகாப்பு படையினர் நடத்திய அதிரடியில் 2 பயங்கரவாதிகளும் சுட்டுக்கொல்லப்பட்டனர். அவர்களிடம் இருந்த வெடிபொருட்கள் பறிமுதல் செய்யப்பட்டது.

சுட்டுக்கொல்லப்பட்ட பயங்கரவாதிகளில் ஒருவன் பயாஸ் என்று தெரியவந்துள்ளது. அவன் காஷ்மீரில் பல்வேறு தாக்குதல் சம்பவங்களில் தொடர்புடையவன்.

இந்த ஆண்டு முதல் காஷ்மீரில் பாதுகாப்பு படையினர் நடத்திய அதிரடி வேட்டைகளில் இதுவரை சுமார் 80 பயங்கரவாதிகள் சுட்டுக்கொல்லப்பட்டு இருப்பது குறிப்பிடத்தக்கது.
Tags:    

Similar News