சக்கராப்பள்ளி சக்கரவாகேஸ்வரர் கோவில் சப்தஸ்தான விழாவில் ஏழூர் பல்லக்கு புறப்பாடு

தஞ்சை மாவட்டம் அய்யம்பேட்டை அருகே சக்கராப்பள்ளியில் தேவநாயகி அம்பாள் சமேத சக்கரவாகேஸ்வரர் கோவில் உள்ளது. திருஞானசம்பந்தர் மற்றும் திருநாவுக்கரசரால் பாடல் பெற்ற கோவிலான இங்கு சப்தஸ்தான விழா கடந்த 19-ந் தேதி கொடியேற்றத்துடன் தொடங்கியது.

அதைத்தொடர்ந்து சாமி வீதி உலா நடைபெற்று வருகிறது. விழாவின் முக்கிய நிகழ்ச்சியான ஏழூர் பல்லக்கு புறப்பாடு நேற்று நடந்தது. விழாவை முன்னிட்டு அய்யம்பேட்டை சவுராஷ்டிரா சபைக்கு சொந்தமான கண்ணாடி பல்லக்கில் அலங்கரிக்கப்பட்ட தேவநாயகி அம்பாள் சமேத சக்கரவாகேஸ்வரர் எழுந்தருளினார். அப்போது கோவில் வளாகத்தில் கூடியிருந்த ஆயிரக்கணக்கான பக்தர்கள் கோபுர தரிசனமும், சாமி தரிசனமும் செய்தனர்.

தொடர்ந்து பல்லக்கு அய்யம்பேட்டை எல்லைவரை சென்று பின்னர் வழுத்தூர், சரபோஜிராஜபுரம், சூலமங்கலம், நல்லிச்சேரி, பசுபதிகோவில் ஆகிய ஊர்களில் வலம் வந்தது. இரவு குடமுருட்டி ஆற்றில் வாணவேடிக்கை நிகழ்ச்சி நடைபெற்றது. இன்று (புதன்கிழமை) பல்லக்கு இலுப்பக்கோரை கிராமத்திற்கு சென்று மீண்டும் பசுபதிகோவிலை வந்தடைகிறது.

தொடர்ந்து அய்யம்பேட்டை முக்கிய வீதிகளில் வலம் வந்து இன்று மாலை மதகடி பஜார் அருகே உள்ள அழகுநாச்சி அம்மன் கோவில் முன்பாக பொம்மை பூ போடும் நிகழ்ச்சி நடக்கிறது. விழா ஏற்பாடுகளை சுவாமிமலை சுவாமிநாத சுவாமி கோவில் நிர்வாகிகள், அய்யம்பேட்டை பேரூராட்சி நிர்வாகத்தினர் மற்றும் ஏழூர் கிராம மக்கள் செய்துள்ளனர்.

இன்று மாலை பொம்மை பூ போடும் நிகழ்ச்சி நடைபெறுவதை முன்னிட்டு தஞ்சை - கும்பகோணம் சாலையில் மாலை 4 மணி முதல் பூ போடும் நிகழ்ச்சி முடியும் வரை போக்குவரத்து மாற்றம் செய்யப்படுகிறது.

அதன் படி தஞ்சையில் இருந்து கும்பகோணம் செல்லும் வாகனங்கள் திருவையாறு, கபிஸ்தலம், பாபநாசம் வழியாக கும்பகோணம் சென்றடையும். அதே போல கும்பகோணத்தில் இருந்து தஞ்சை செல்லும் வாகனங்கள் பாபநாசம், கபிஸ்தலம், திருவையாறு வழியாக தஞ்சை சென்றடையும் என போலீசார் தெரிவித்தனர்.