நிமிடங்களில் விற்றுத்தீர்ந்த ராயல் என்பீல்டு மோட்டார்சைக்கிள்

ராயல் என்பீல்டு நிறுவனத்தின் 650 ட்வின்ஸ் ஆனிவர்சரி எடிஷன் மோட்டார்சைக்கிள் விற்பனை துவங்கிய 120 நொடிகளில் விற்றுத்தீர்ந்தது. இந்த விற்பனையில் மொத்தம் 120 யூனிட்கள் விற்பனை செய்யப்பட்டன. மிலனில் நடைபெற்ற இ.ஐ.சி.எம்.ஏ. 2021 விழாவில் ராயல் என்பீல்டு 650 ட்வின் ஆனிவர்சரி எடிஷன் மாடல்கள் அறிமுகம் செய்யப்பட்டன.

சர்வதேச சந்தையில் மொத்தம் 480 யூனிட்கள் மட்டுமே விற்பனை செய்யப்படுவதாக ராயல் என்பீல்டு அறிவித்தது. இவற்றில் 120 யூனிட்கள் இந்தியாவுக்காக ஒதுக்கீடு செய்யப்பட்டு, விற்பனைக்கு கொண்டுவரப்பட்டன. எனினும், விற்பனை துவங்கிய நொடிகளிலேயே 120 யூனிட்களும் விற்றுத்தீர்ந்ததாக ராயல் என்பீல்டு அறிவித்து இருக்கிறது. 

லிமிடெட் எடிஷன் ராயல் என்பீல்டு 650 ட்வின்ஸ் ஆனிவர்சரி எடிஷன் மாடல்களில் ரிச் பிளாக் குரோம் பெயிண்டிங் செய்யப்பட்டு உள்ளது. இந்த மாடல் ராயல் என்பீல்டு நிறுவனத்தின் 120 ஆண்டு விழாவை கொண்டாடும் வகையில் வெளியிடப்பட்டது. ஸ்பெஷல் எடிஷன் மாடல்களில் பிரத்யேக பிளாக்டு-அவுட் ராயல் என்பீல்டு அக்சஸரீக்கள் வழங்கப்படுகின்றன.