தொடர்ந்து தாமதமாகும் ஐபோன் 12 உற்பத்தி பணிகள்

 

கொரோனா வைரஸ் பாதிப்பு காரணமாக ஆப்பிள் நிறுவன உற்பத்தி பணிகள் தாமதமாகி இருக்கிறது. இதன் காரணமாக ஐபோன் 12 உற்பத்தி பணிகளில் தொய்வு நிலை ஏற்பட்டு இருப்பதாக ஆப்பிள் வல்லுநர் வெளியிட்டிருக்கும் தகவல்களில் தெரிவிக்கப்பட்டுள்ளது.

மேலும் சமீபத்தில் ஆப்பிள் அறிமுகம் செய்த புதிய ஐபோன் எஸ்இ மாடல் எதிர்பார்ப்புகளை கடந்து அதிகளவு முன்பதிவு நடைபெற்று இருப்பதாக கூறப்படுகிறது. மேலும் இதன் காரணமாக ஐபோன் 11 விற்பனையில் பாதிப்பு ஏற்படலாம் என கூறப்படுகிறது.  

ஐபோன் 12 மாடலுக்கான முதற்கட்ட பணிகள் ஆன்லைன் மூலம் துவங்கப்பட்டு இருப்பதாக கூறப்படுகிறது. ஆப்பிள் நிறுவனம் இந்த ஆண்டு மொத்தம் நான்கு ஐபோன் 12 மாடல்களை வெளியிட இருக்கிறது. இவை 6.1, 5.4 இன்ச் மற்றும் 6.7 இன்ச் அளவுகளில் உருவாகி வருகிறது. 

புதிய ஐபோன் மாடல்களின் உற்பத்தி செப்டம்பர் மாதத்தில் துவங்கும் என்றும் 6.7 இன்ச் மாடல் மட்டும் அக்டோபர் மாதத்தில் உற்பத்தி செய்யப்படும் என கூறப்படுகிறது. இவற்றுக்கான அறிவிப்பு மற்றும் விநியோக தேதிகள் ஒரேகட்டமாக அறிவிக்கப்படும் என எதிர்பார்க்கப்படுகிறது.

ஐபோன் எஸ்இ முன்பதிவுகள் எதிர்பார்ப்புகளை கடந்து இருந்தாலும், சந்தையின் தற்போதைய சூழலில் இது குறைவு தான் என கூறப்படுகிறது. ஐபோன் 12 மட்டுமின்றி ஐபோன் எஸ்இ பிளஸ் மாடலின் வெளியீடு தாமதமாகும் என கூறப்படுகிறது. இந்த ஸ்மார்ட்போன் 5.5 இன்ச் அளவில் உருவாகி இருப்பதாக கூறப்படுகிறது.