அஸ்வின் குறித்து மஞ்ச்ரேக்கருக்கு கருத்துக்கு இயன் சேப்பல் பதிலடி

புதுடெல்லி:

இந்திய அணியின் முன்னணி சுழற்பந்து வீரர்களில் ஒருவர் ஆர்.அஸ்வின். சென்னையை சேர்ந்த அவர் தற்போது டெஸ்ட் போட்டியில் மட்டுமே விளையாடி வருகிறார்.

34 வயதான அஸ்வின் 78 டெஸ்டில் விளையாடி 409 விக்கெட் வீழ்த்தி உள்ளார். 59 ரன் கொடுத்து 7 விக்கெட் வீழ்த்தியது சிறந்த பந்து வீச்சாகும். 30 முறை ஒரு இன்னிங்சில் 5 விக்கெட்டுக்கு மேல் எடுத்துள்ளார். இந்திய மண்ணில் 24 முறையும், வெளிநாட்டில் 6 முறையும் இதை சாதித்து உள்ளார்.

7 தடவை ஒரு டெஸ்டில் 10 விக்கெட்டுக்கு மேல் கைப்பற்றி உள்ளார். சமீபத்தில் இந்திய மண்ணில் இங்கிலாந்துக்கு எதிரான டெஸ்ட் தொடரில் அவர் 32 விக்கெட்டுகளை வீழ்த்தினார்.

அஸ்வின் அதிக விக்கெட் கைப்பற்றிய இந்திய வீரர்களில் தற்போது 4-வது இடத்தில் உள்ளார்.

இந்தநிலையில் அஸ்வின் எக்காலத்திற்கும் தலை சிறந்த பந்து வீச்சாளர் என்று அழைப்பதில் சிக்கல் இருப்பதாக இந்திய அணியின் முன்னாள் வீரர் சஞ்சய் மஞ்ச்ரேக்கர் விமர்சனம் செய்துள்ளார். இதுதொடர்பாக அவர் கூறியதாவது:-

தென்ஆப்பிரிக்கா, இங்கிலாந்து, நியூசிலாந்து, ஆஸ்திரேலியா ஆகிய நாடுகளில் அஸ்வின் ஒருமுறை கூட 5 விக்கெட்டுகளை வீழ்த்தியது இல்லை. கடந்த 4 ஆண்டுகளில் இந்திய ஆடுகளங்களில் அஸ்வினுக்கு இணையாக விக்கெட் வீழ்த்தும் திறமையை ஜடேஜா பெற்றிருக்கிறார்.

மேலும் இங்கிலாந்துக்கு எதிரான தொடரில் அஸ்வினை காட்டிலும் அக்‌ஷர்பட்டேல் அதிக விக்கெட்டுகளை வீழ்த்தி உள்ளார். இதுவே அஸ்வினை எல்லா கால கட்டத்துக்கும் தலைசிறந்த வீரர் என்று அழைப்பதில் எனக்கு இருக்கும் பிரச்சினையாகும்.

இவ்வாறு மஞ்சுரேக்கர் கூறி உள்ளார்.

மஞ்சுரேக்கரின் விமர்சனத்துக்கு ஆஸ்திரேலிய முன்னாள் கேப்டனும், டெலிவி‌ஷன் வர்ணனையாளருமான இயன் சேப்பல் பதிலடி கொடுத்துள்ளார். இதுதொடர்பாக அவர் கூறியதாவது:-

அஸ்வின் மிகச்சிறந்த சுழற்பந்து வீரர் ஆவார். ஆஸ்திரேலியாவை சேர்ந்த நாதன் லயனை விட அவர் சிறந்த வீரர் ஆவார். வெஸ்ட் இண்டீசை சேர்ந்த ஜோல் கார்னர் அச்சுறுத்தும் பந்து வீச்சாளர் ஆவார். ஆனால் அவர் அதிக முறை 5 விக்கெட்டுக்கு மேல் கைப்பற்றி உள்ளாரா?

என்னை பொறுத்தவரை அஸ்வின் சிறந்த பந்து வீச்சாளர் ஆவார்.

இவ்வாறு அவர் கூறி உள்ளார்.