2-வது ஒருநாள் கிரிக்கெட் போட்டி: அயர்லாந்தை வீழ்த்தி தொடரை கைப்பற்றியது ஆப்கானிஸ்தான்

ஆப்கானிஸ்தான் - அயர்லாந்து அணிகளுக்கு இடையிலான 2-வதுது ஒருநாள் கிரிக்கெட் போட்டி இன்று அபு தாபியில் நடைபெற்றது. அயர்லாந்து அணி முதலில் பேட்டிங் செய்தது. தொடக்க வீரர் ஸ்டிர்லிங் (128) சதம் அடிக்க அந்த அணி 50 ஓவரில் 9 விக்கெட் இழப்பிற்கு 259 ரன்கள் சேர்த்தது. ஆப்கானிஸ்தான் அணி சார்பில் நவீன் உல் ஹக் 4 விக்கெட்டும், முஜீப் உர் ரஹ்மான் 3 விக்கெட்டும் வீழ்த்தினர்.

பின்னர் 260 ரன்கள் அடித்தால் வெற்றி என்ற இலக்குடன் ஆப்கானிஸ்தான் அணி களம் இறங்கியது. ரஹ்மத் ஷா ஆட்டமிழக்காமல் 103 ரன்களும், ஹஸ்மதுல்லா ஷாஹிதி 82 ரன்களும் அடிக்க ஆப்கானிஸ்தான் 45.2 ஓவரில் 3 விக்கெட் இழப்பிற்கு 260 ரன்கள் எடுத்து 7 விக்கெட் வித்தியாசத்தில் அபார வெற்றி பெற்றது.

ஏற்கனவே முதல் போட்டியில் வெற்றி பெற்றிருந்ததால், இந்த வெற்றியின் மூலம் மூன்று போட்டிகள் கொண்ட தொடரை 2-0 எனக் கைப்பற்றியுள்ளது.