லைஃப்ஸ்டைல்
அடுக்கடுக்காய் தங்க வளையல்கள்

பெண்கள் விரும்பும் அழகழகாய் அடுக்கடுக்காய் தங்க வளையல்கள்

Published On 2020-11-03 06:25 GMT   |   Update On 2020-11-03 06:25 GMT
பெண்கள் அணியும் தங்க நகைகளிலேயே வயது வித்தியாசமின்றி அவசியமாய் அணியும் ஆபரணங்களில் ஒன்று வளையல்கள். தினசரி அணிந்து கொள்ளும் வளையல்கள் பெண்களுக்கு இன்றியமையாத ஒன்றாகும்.
பெண்கள் அணியும் தங்க நகைகளிலேயே வயது வித்தியாசமின்றி அவசியமாய் அணியும் ஆபரணங்களில் ஒன்று வளையல்கள். தினசரி அணிந்து கொள்ளும் வளையல்கள் பெண்களுக்கு இன்றியமையாத ஒன்றாகும். எனவே தான் வளையல்களில் அத்தனை அத்தனை டிசைன்கள் வந்து கொண்டே இருக்கின்றன.

இந்த பண்டிகைகாலங்களுக்காகவும் பல புதிய டிசைன்களில் வளையல்களை கடைகளில் காணமுடிகிறது. தங்கவளையல். கல்பதித்த வளையல்கள், முத்து பவளம் போன்றவை பதித்த வளையல்கள், வைரம் பதித்த வளையல்கள், எனாமல் வேலைப்பாடு செய்யப்பட்ட வளையல்கள் என்று பலப்பல புதிய வடிவங்களில் வளையல்களை காண முடிந்தது.

வெறும் தங்கத்தினால் ஆன கெட்டி வளையல்கள் தினசரி அணிந்து கொள்வதற்கு ஏற்றவையாக இருக்கும். இந்த வகைகளில் தற்போதைய புதிய டிசைன்கள் மனதை கவரக்கூடியதாக வந்துள்ளது. கம்பிவேலைப்பாடுகள், மெல்லிய கட்டில் நுண்மையாக செதுக்கப்பட்டது போன்ற வடிவங்களில் டிசைன்கள் பார்க்க எளிமையாகவும் கவர்ச்சியாகவும் தினசரி அலுவலகங்களுக்கு அணிந்து செல்லக் கூடியவகையிலும் அழகாய் இருக்கின்றன. சிறுசிறு தங்கப்பூக்களை வரிசையாக ஒன்றன்பின் ஒன்றாக அடுக்கியது போன்ற தோற்றத்தில் வந்திருக்கும் வளையல்கள் வித்தியாசமாக இருக்கிறது. சிறுமணிகள் கோர்க்கப்பட்ட போன்ற வடிவத்தில் ஒரு விரற்கடை அளவு அகலம் கொண்டதாக உள்ள வளையல்கள் பார்க்க கம்பீரமாக காட்சியளிக்கிறது.

தங்க வளையல்களில் உள்ள டிசைன்களை போலவே கல் பதித்த நகைகளும் புது புது டிசைன்கள் அதிகளவில் இன்றைய நகைகடைகளில் பார்க்க முடிகிறது. வெறும் வெள்ளை நிற கற்களும் பலவண்ணகற்களும் பதிக்கப்பட்ட வளையல்கள் மிக அழகானவை. ஒரு வரிசையில் வெள்ளைகற்கள் பதிக்கப்பட்டு ஆங்காங்கே கற்கள் பதிக்கப்பட்ட பூக்கள் நடுவில் இருப்பது போல் வடிவமைக்கப்பட்டிருக்கும் வளையல்கள் மிக நேர்த்தியாக காட்சியளிக்கின்றன.

மிகவும் தடிமனாக காட்சியளிக்கும் ஆன்டிக் வகை வளையல்கள் அன்கட் மற்றும் அன்பாலிஸ்ட் கற்கள் பதிக்கப்பட்டு பார்க்க மிக பிரம்மாண்டமாகவும் பாரம்பரிய தோற்றத்தைக் கொண்டதாகவும் இருப்பதை காண முடிகிறது. பொதுவாக வைர வளையல்கள் மிக மெல்லிய வடிவமைப்பு கொண்டவையாகவும் ஆங்காங்கே கற்கள் தனித்து தெரிய கூடியதாகவும் அமைக்கப்பட்டிருக்கும். ஆனால் இதற்கு மாறாக மிக பொடியான வைரக்கற்களை கொத்துக்கொத்தாக பதிக்கப்பட்டு வரும் இன்றைய வைரவளையல்கள் பார்க்க பிரமிப்பூட்டும் விதமாகவும் கவர்ச்சியாகவும் இருக்கின்றன. வைரக்கற்கள் பதிக்கப்பட்ட வளையல்களில் ஆங்காங்கே பச்சை மரகதம், சிவப்பு கெம்புகற்கள் பதிக்கப்படும் போது மிக அழகான தோற்றத்தை கொண்டவையாக இருக்கின்றன.

நகாசு வேலை செய்யப்பட்ட வளையல்கள், கொல்கத்தா ஃபிலிகிரி டிசைன் வளையல்கள், ரோடியம்ஃபினிஷ் கொண்ட வளையல்கள், ஓரடுக்கு, ஈரடுக்கு மற்றும் பல அடுக்கு கொண்ட வளையல்கள் பல டிசைன்களில் கற்கள் பதித்தும் பதிக்காமலும் கிடைக்கின்றன. ஈரடுக்கு, மூன்றடுக்கு மற்றும் நான்கு அடுக்கு வளையல்களில் இரண்டு அடுக்குகளுக்கு இடையே அழகான சிறுபூக்கள், முத்துக்கள், நட்சத்திரங்கள் கொண்ட டிசைன்கள் பார்க்க அலங்காரமாய் தெரிகிறது.

சில வளையல்கள் பார்ப்பதற்கு மிகவும் கம்பீரமாகவும் அகலமாகவும் அதிக வேலைப்பாடு கொண்டதாகவும் இருந்தாலும் மிகவும் எடை குறைவாக, லேசாக, அணிந்து கொள்ள வசதியாக இருப்பது ஆச்சரியமான வடிவமைப்பு ஆகும். மிக ல்லிய கம்பிகளை சுற்றி முறுக்கி கயிறு போல் பின்னி செய்யப்படும் வளையல்கள் நல்ல உறுதியான தோற்றத்தையும் நளினமான அழகையும் கொடுக்கக்கூடியதாக இருக்கின்றன. சில வளையல்களில் பாதி இடத்திற்கு நல்ல வழுவழுப்பான ஃபினிஷ் கொண்டதாகவும், மீதி இடத்திற்கு சொரசொரப்பான பினிஷ் கொண்டதாகவும் அமைக்கப்பட்டிருப்பது வித்தியாசமாகவும் அழகாகவும் இருக்கின்றன. இப்படி ன்னும் எத்தனையோ அழகழகான வடிவமைப்புகளில் நகைக்கடைகளில் காட்சியளிக்கும் வளையல்களை பார்ப்பதே மிகவும் பூரிப்பு அளிப்பதாகவும் வாங்கி அணியும் போது மகிழ்ச்சியில் ஆழ்த்தகூடியதாகவும் இருப்பது மறுக்க முடியாத உண்மையே!!
Tags:    

Similar News