பிளெஷர் பிளஸ் பிஎஸ்6 விலையில் மாற்றம் செய்த ஹீரோ மோட்டோகார்ப்

 

ஹீரோ மோட்டோகார்ப் நிறுவனம் சமீபத்தில் தனது ஸ்கூட்டர் மாடல்களின் விலையை உயர்த்துவதாக அறிவித்தது. சமீபத்தில் டெஸ்டினி 125 பிஎஸ்6 மாடல் விலை உயர்த்தப்பட்ட நிலையில், தற்சமயம் பிளெஷர் பிளஸ் பிஎஸ்6 மாடல் விலை உயர்த்தப்பட்டு இருக்கிறது.

இந்தியாவில் ஸ்டீல் வீல்களை கொண்ட பிளெஷர் பிளஸ் பிஎஸ்6 மாடல் ரூ. 56100 என்றும் அலாய் வீல் மாடல் விலை ரூ. 58100 என நிர்ணயம் செய்யப்பட்டு இருந்தது. தற்சமயம் இரு மாடல்களின் விலையும் ரூ. 1300 வரை உயர்த்தப்பட்டு இருக்கிறது. 

குறைந்த எடையில் காம்பேக்ட் வடிவமைப்பு கொண்டிருக்கும் பிளெஷர் பிளஸ் பிஎஸ்6 மாடல் பெண் ஓட்டுனர்களை குறிவைத்து வெளியிடப்பட்டு இருக்கின்றன. இந்தியாவில் பிஎஸ்6 பிளெஷர் மாடல் ஜனவரி 2020 வாக்கில் அறிமுகம் செய்யப்பட்டது. புதிய ஸ்கூட்டரில் குரோம் ஹெட்லேம்ப், சைடு அக்சென்ட்கள் மற்றும் 3டி லோகோ வழங்கப்பட்டு உள்ளது.

ஹீரோ பிளெஷர் பிளஸ் பிஎஸ்6 மாடலில் 110சிசி, ஏர் கூல்டு, ஃபியூயல் இன்ஜெக்ட் செய்யப்பட்ட என்ஜின் வழங்கப்பட்டு இருக்கிறது. இந்த என்ஜின் 8 பிஹெச்பி பவர், 8.7 என்எம் டார்க் செயல்திறன் வழங்குகிறது. புதிய என்ஜின் முந்தைய மாடலில் இருந்ததை விட 10 சதவீதம் கூடுதல் மைலேஜ் வழங்கும் என தெரிவிக்கப்பட்டு இருக்கிறது.