மதுரை அரசு ஆஸ்பத்திரியில் எலும்பு வங்கி

மதுரை:

தமிழகத்தில் சென்னை, கோவை போன்ற இடங்களில் எலும்பு வங்கிகள் செயல்பட்டு வருகிறது. இந்த நிலையில் தென்மாவட்ட மக்கள் பயன்பெறும் வகையில் மதுரை அரசு மருத்துவமனையில் எலும்பு வங்கி அமைக்கப்பட வேண்டும் என பல்வேறு தரப்பினர் தொடர்ந்து வலியுறுத்தி வந்தனர். அதன் தொடக்கமாக மதுரை அரசு ஆஸ்பத்திரியில் எலும்பு வங்கி அமைப்பதற்கான முதற்கட்ட பணிகள் நேற்று தொடங்கி இருக்கிறது. இதுகுறித்து அரசு ஆஸ்பத்திரி டாக்டர்கள் கூறியதாவது:-


எப்படியும் எலும்பு வங்கி மக்கள் பயன்பாட்டிற்கு வர இன்னும் சில மாதங்கள் ஆகலாம். இந்த பணிகள் முடிந்து பயன்பாட்டுக்கு வரும் பட்சத்தில் தென்மாவட்டம் முழுவதும் உள்ள மக்கள் மிகுந்த பயன் அடைவார்கள். இறந்த நபர்கள் மற்றும் மூளைச்சாவு அடைந்தவர்களிடம் இருந்து சேகரிக்கப்படும் எலும்புகளைக் கொண்டு மாற்று அறுவை சிகிச்சை மூலம் மறுவாழ்வு அளிக்க முடியும். குறிப்பாக விபத்தில் கை, கால்கள் முழுவதும் அகற்றப்பட்டால், விளையாடும் போது கை, கால்களில் முறிவு ஏற்பட்டால் இந்த எலும்பு வங்கியின் மூலம் மாற்று எலும்புகள் வாங்கி உடலில் பொருத்தி கொள்ள முடியும். ரத்த வங்கியை போன்று இதன் செயல்பாடுகள் இருக்கும்.

இவ்வாறு அவர்கள் கூறினார்கள்.