உண்மை எது
தி ஒமிக்ரான் வேரியண்ட் திரைப்படமாக வெளியானதாக வைரலாகும் போஸ்டர்
தி ஒமிக்ரான் வேரியண்ட் எனும் தலைப்பில் திரைப்படம் உருவாகி 1960-க்களில் வெளியானது என கூறும் தகவல் வைரலாகி வருகிறது.
கடந்த வாரம் இந்தியாவிலும் ஒமிக்ரான் வேரியண்ட் பாதிப்பு கண்டறியப்பட்டது. தற்போது இதன் எண்ணிக்கை மெல்ல அதிகரிக்க துவங்கி இருக்கிறது. இதைத் தொடர்ந்து டுவிட்டரிலும் ஒமிக்ரான் வேரியண்ட் எனும் ஹேஷ்டேக் டிரெண்ட் ஆக துவங்கியது.
இந்த நிலையில், 'தி ஒமிக்ரான் வேரியண்ட்' எனும் தலைப்பில் திரைப்படம் ஒன்று உருவாகி 1963 ஆம் ஆண்டு வெளியானதாக கூறி படத்தின் சுவரொட்டி டுவிட்டரில் வேகமாக வைரலாகி வருகிறது. சுவரொட்டியில் பூமி மயானமாக மாறிய நாள் எனும் வாசகமும் இடம்பெற்று இருக்கிறது.
இதே சுவரொட்டியை இயக்குனர் ராம் கோபால் வர்மாவும் தனது அதிகாரப்பூர்வ டுவிட்டர் பக்கத்தில் பதிவிட்டுள்ளார். 'நம்புங்கள் அல்லது மயங்கிவிடுங்கள், இந்த திரைப்படம் 1963 ஆண்டு வெளியானது, இதில் உள்ள வாசகத்தை பாருங்கள்,' எனும் தலைப்பில் இதனை அவர் பதிவிட்டுள்ளார்.
இதுகுறித்த இணைய தேடல்களில் தி ஒமிக்ரான் வேரியண்ட் எனும் பெயரில் எந்த திரைப்படமும் உருவாகவில்லை என தெரியவந்துள்ளது. மேலும் இதனை ஐரிஷ் இயக்குனரும், எழுத்தாளருமான பெக்கி சீட்டிள் கற்பனையாக உருவாக்கியதாக தெரிவித்து இருக்கிறார். அந்த வகையில் தி ஒமிக்ரான் வேரியண்ட் என்ற தலைப்பில் திரைப்படம் வெளியானதே இல்லை என உறுதியாகிவிட்டது.