சையத் முஷ்டாக் அலி டிராபி: முதல் ஆட்டத்தில் 66 ரன் வித்தியாசத்தில் ஜார்க்கண்ட்-ஐ வீழ்த்திய தமிழ்நாடு

கொரோனா பொது ஊரடங்கிற்குப் பிறகு இந்தியாவில் முதன்முறையாக இன்று கிரிக்கெட் போட்டிகள் தொடங்கின. சையத் முஷ்டாக் அலி டிராபி டி20 கிரிக்கெட் தொடரில் கொல்கத்தா ஈடன் கார்டன் மைதானத்தில் நடைபெற்ற ஆட்டத்தில் தமிழ்நாடு - ஜார்க்கண்ட் அணிகள் மோதின.

முதலில் பேட்டிங் செய்த தமிழ்நாடு 20 ஓவரில் 5 விக்கெட் இழப்பிற்கு 189 ரன்கள் குவித்தது, தொடக்க வீரர் ஹரி நிஷாந்த் ஆட்டமிழக்காமல் 64 பந்தில் 92 ரன்கள் விளாசினார். கேப்டன் தினேஷ் கார்த்திக் 17 பந்தில் 3 பவுண்டரி, 4 சிக்சருடன் 46 ரன்கள் விளாசினார்.

பின்னர் 190 ரன்கள் அடித்தால் வெற்றி என்ற இலக்குடன் ஜார்க்கண்ட் களம் இறங்கியது. ஜார்க்கண்ட் அணி சீரான இடைவெளியில் விக்கெட்டுகள இழக்க 20 ஓவரில் 7 விக்கெட் இழப்பிற்கு 123 ரன்களே அடித்தது. இதனால் தமிழ்நாடு அணி 66 ரன்கள் வித்தியாசத்தில் வெற்றி பெற்றது.

சோனு யாதவ் 3 விக்கெட்டும், சந்தீப் வாரியார் 2 விக்கெட்டும் வீழ்த்தினர்.