ஆட்டோமொபைல்
ரூ. 28,200 விலை குறைப்புடன் ரெவோல்ட் ஆர்வி400 முன்பதிவு மீண்டும் துவக்கம்
ரெவோல்ட் இன்டெலிகார்ப் நிறுவனத்தின் ஆர்வி400 எலெக்ட்ரிக் மோட்டார்சைக்கிள் முன்பதிவு மீண்டும் துவங்கி உள்ளது.
இந்தியாவில் பேம் 2 திட்டத்தில் மாற்றம் செய்யப்பட்டதால் ஆர்வி400 எலெக்ட்ரிக் மோட்டார்சைக்கிள் விலை ரூ. 28,200 குறைந்துள்ளது. அதன்படி ரெவோல்ட் ஆர்வி400 புதிய விலை ரூ. 90,799 எக்ஸ்-ஷோரூம் என மாறி இருக்கிறது. ஆர்வி300 மாடலுக்கு விலை குறைப்பு அறிவிக்கப்படவில்லை.
விலை குறைப்பு மட்டுமின்றி ரெவோல்ட் ஆர்வி400 முன்பதிவு இன்று (ஜூன் 18) மதியம் 12 மணி முதல் மீண்டும் துவங்கி உள்ளது. இரு மாடல்களுக்கான முன்பதிவு கட்டணம் முறையே ரூ. 7,999 மற்றும் ரூ. 7,199 என நிர்ணயம் செய்யப்பட்டு உள்ளது. முன்னதாக ரெவோல்ட் ஆர்வி400 ரூ. 1.19 லட்சம் எக்ஸ்-ஷோரூம் விலையில் விற்பனை செய்யப்பட்டு வந்தது.
ரெவோல்ட் ஆர்வி400 மாடலில் 3.24kWh லித்தியம் அயன் பேட்டரி மற்றும் 3kW எலெக்ட்ரிக் மோட்டார் வழங்கப்பட்டு இருக்கிறது. இந்த மோட்டார்சைக்கிள் ஒருமுறை சார்ஜ் செய்தால் 156 கிலோமீட்டர் வரை செல்லும் திறன் கொண்டுள்ளது. இந்த மாடல் மணிக்கு அதிகபட்சம் 85 கிலோமீட்டர் வேகத்தில் செல்லும்.