மீனாட்சி அம்மன் கோவிலில் தங்க ரத உலா நடைபெறாது

மதுரை மீனாட்சி அம்மன் கோவில் திருக்கார்த்திகை உற்சவ விழாவில் தங்க ரத உலா நடைபெறாது என்று அறிவிக்கப்பட்டுள்ளது.

இது குறித்து கோவிலின் இணை ஆணையர் செல்லத்துரை வெளியிட்டுள்ள செய்திக்குறிப்பில் கூறியிருப்பதாவது:-

மதுரை மீனாட்சி அம்மன் கோவிலில் இன்று (நேற்று) தொடங்கிய திருக்கார்த்திகை உற்சவ விழா அடுத்த மாதம் (டிசம்பர்) 3-ந் தேதி வரை நடைபெற உள்ளது. இந்த உற்சவம் 10 நாட்களும் நடைபெறும்.

மீனாட்சி சுந்தரேசுவரர் பஞ்ச மூர்த்திகளுடன் காலை, மாலை ஆகிய 2 வேளைகளிலும் ஆடி வீதி வழியாக புறப்பாடாகிறார்கள். 29-ந் தேதி திருக்கார்த்திகையன்று மாலை கோவில் முழுவதும் லட்ச தீபம் ஏற்றப்படும்.

அன்றைய தினம் இரவு 7 மணியளவில் மீனாட்சி சுந்தரேசுவரர் பஞ்சமூர்த்திகளுடன் புறப்பாடாகி, அம்மன் சன்னதி திருவாச்சி மண்டபம் சென்று சுவாமி சன்னதி, அம்மன் சன்னதி சித்திரை வீதியில் சொக்கப்பனை ஏற்றும் நிகழ்ச்சிக்கு எழுந்தருளுகிறார்.

மேற்படி 2 இடங்களில் சொக்கப்பனை ஏற்றப்படும். மேலும் உபய தங்கரத உலா மற்றும் உபய திருக்கல்யாணம் ஆகிய விசேஷங்கள் எதுவும் நடைபெறாது.

இவ்வாறு அதில் கூறப்பட்டுள்ளது.