ஆட்டோமொபைல்
விற்பனையில் 6 சதவிகிதம் வளர்ச்சியை பதிவு செய்த டி.வி.எஸ். மோட்டார்
டி.வி.எஸ். மோட்டார் கம்பெனி நிறுவனம் தனது வாகனங்கள் விற்பனையில் 6 சதிவிகித வளர்ச்சியை பதிவு செய்திருக்கிறது. #TVSMotor
டி.வி.எஸ். மோட்டார் கம்பெனி நிறுவனம் கடந்த ஆண்டு டிசம்பர் மாத விற்பனையில் 6 சதவிகித வளர்ச்சியை பதிவு செய்துள்ளது.
டி.வி.எஸ். நிறுவனம் 2017 டிசம்பரில் 2,56,870 யூனிட்களை விற்பனை செய்திருந்த நிலையில், கடந்த ஆண்டு டிசம்பர் மாதம் 2,71,395 யூனிட்கள் விற்பனை செய்துள்ளது. இதுகுறித்து அந்நிறுவனம் வெளியிட்டிருக்கும் அறிக்கையில், டிசம்பர் 2017 உடன் ஒப்பிடும் போது டிசம்பர் 2018 இல் வாகன விற்பனையில் 4 சதவிகிதம் வளர்ச்சியடைந்திருக்கிறது.
2017 டிசம்பரில் உள்நாட்டு இருசக்கர வாகனங்கள் விற்பனை 2,07,739 யூனிட்களாக இருந்த நிலையில், கடந்த ஆண்டு டிசம்பரில் 2,09,906 யூனிட்கள் விற்பனையாகி ஒரு சதவிகித வளர்ச்சியை பதிவு செய்துள்ளது.
டி.வி.எஸ். நிறுவனத்தின் ஸ்கூட்டர் விற்பனை முந்தைய ஆண்டுடன் ஒப்பிடும் போது 9 சதவிகிதம் அதிகரித்துள்ளது. 2017 டிசம்பரில் 83,638 யூனிட்கள் விற்பனையானது. கடந்த ஆண்டு டிசம்பரில் 91,480 யூனிட்கள் விற்பனையாகி இருக்கிறது.
மோட்டார்சைக்கிள் விற்பனை 2017 டிசம்பரில் 95,246 யூனிட்கள் விற்பனையாகி இருந்த நிலையில், கடந்த ஆண்டு டிசம்பரில் 1,07,189 யூனிட்கள் விற்பனையாகி 13 சதவிகித வளர்ச்சி பெற்றுள்ளது.
டி.வி.எஸ். நிறுவனத்தின் ஒட்டுமொத்த ஏற்றுமதி 26 சதவிகிதம் வளர்ச்சி பெற்றுள்ளது. கடந்த ஆண்டு டிசம்பரில் மட்டும் டி.வி.எஸ். நிறுவனம் 60,262 யூன்ட்களை ஏற்றுமதி செய்துள்ளது. முந்தைய ஆண்டு டிசம்பரில் டி.வி.எஸ். நிறுவனம் 47,818 யூனிட்கள் ஏற்றுமதியாகி இருந்தது.