நாளை கொல்கத்தா செல்கிறார் முக ஸ்டாலின்

சென்னை:

பாராளுமன்ற தேர்தலில் பாரதிய ஜனதா கட்சியை தோற்கடிக்க அகில இந்திய அளவில் எதிர்க்கட்சிகள் ஓரணியில் சேர்ந்து வருகிறது.

மதசார்பற்ற அணி என்ற பெயரில் எதிர்க்கட்சிகளை ஒருங்கிணைக்க தி.மு.க. தலைவர் மு.க.ஸ்டாலின் முழு முயற்சியுடன் ஈடுபட்டுள்ளார்.

இதன் தொடக்கமாக கடந்த டிசம்பர் மாதம் 10-ந்தேதி டெல்லியில் அனைத்து எதிர்க்கட்சித் தலைவர்களின் ஆலோசனை கூட்டம் சோனியாகாந்தி தலைமையில் நடந்தது.

அப்போது ஒருமித்த கருத்துடன் காங்கிரஸ் தலைமையில் மதசார்பற்ற அணியாக செயல்பட்டு தேர்தலில் பா.ஜனதாவை வீழ்த்த முடிவு செய்யப்பட்டது.

இதன் தொடர்ச்சியாக மறைந்த தி.மு.க. தலைவர் கருணாநிதியின் சிலை திறப்பு விழா கடந்த டிசம்பர் 16-ந்தேதி சென்னையில் நடந்தது. கருணாநிதி சிலையை சோனியா காந்தி திறந்து வைத்தார்.

அப்போது பாரதிய ஜனதாவுக்கு எதிராக ஓரணியில் திரள்வோம் என்று முழக்கமிட்டனர். இந்த கூட்டத்தில் மு.க.ஸ்டாலின் பேசும்போது பிரதமர் வேட்பாளராக ராகுல்காந்தி பெயரை முன் மொழிந்தார்.

இப்போது அகில இந்திய அளவில் எதிர்க்கட்சி தலைவர்களின் 2-ம் கட்ட ஆலோசனை கூட்டம் வருகிற 19-ந்தேதி கொல்கத்தாவில் நடைபெறுகிறது.

மேற்கு வங்காள முதல்-மந்திரி மம்தா பானர்ஜி ஏற்பாடு செய்துள்ள இந்த கூட்டத்தில் மு.க.ஸ்டாலின் பங்கேற்கிறார். இதற்காக அவர் நாளை கொல்கத்தா செல்கிறார். பாராளுமன்ற தேர்தலில் மேற்கொள்ள வேண்டிய பிரசாரம் மற்றும் வியூகங்கள் குறித்து இந்த கூட்டத்தில் ஆலோசிக்க உள்ளனர். #DMK #MKStalin