பிரெஞ்ச் ஓபன் டென்னிஸ்: ரஷிய வீராங்கனை இறுதிப் போட்டிக்கு முன்னேற்றம்

பிரெஞ்ச் ஓபன் டென்னிஸ் பெண்கள் ஒற்றையர் பிரிவு அரையிறுதி ஆட்டம் ஒன்றில் ரஷிய வீராங்கனை (31-ம் நிலை) அனஸ்டாசியா பவ்லுசென்கோவா தரநிலை பெறாத ஸ்லோவேனியாவின் தமரா ஜிடன்செக்கை எதிர்கொண்டார்.

முதல் செட்டில் இருவரும் ஒருவருக்கொருவர் ஈடுகொடுத்து விளையாடினர். என்றாலும் இறுதியில் அனஸ்டாசியா பவ்லுசென்கோவா 7-5 என முதல் செட்டை கைப்பற்றினார். 2-வது செட்டிலும் அனஸ்டாசியா பவ்லுசென்கோவா கையே ஓங்கியது. 2-வது செட்டை 6-3 என எளிதில் கைப்பற்றி 7-5, 6-3 என நேர்செட்டில் வெற்றி பெற்று இறுதிப் போட்டிக்கு முன்னேறினார்.

மற்றொரு அரையிறுதியில் மரியா சக்காரி (கிரீஸ்)- பார்போரா கிரேஜ்சிகோவா (செக் குடியரசு) ஆகியோர் மோதுகிறார்கள். இதில் வெற்றி பெறுபவர் சாம்பியனுக்காக இறுதி ஆட்டத்தில் அனஸ்டாசியா பவ்லுசென்கோவாவை எதிர்கொள்வார்.