புதுவையில் அடுத்த 5 நாட்கள் கனமழைக்கு வாய்ப்பு

புதுச்சேரி:

புதுச்சேரி மாவட்ட கலெக்டர் பூர்வா கார்க் வெளியிட்டுள்ள செய்திக்குறிப்பில் கூறியிருப்பதாவது:-

புதுச்சேரியில் 26.10.2021 முதல் வடகிழக்கு பருவமழை தொடங்கியது. இதுவரை மொத்தம் 87 செ.மீ. மழை பெய்துள்ளது. 18-ந் தேதி காலை 9 மணி முதல் 19-ந் தேதி காலை 9 மணி வரை புதுச்சேரியில் 18.8 செ.மீ. திருக்கனூரில் 25.3 செ.மீ. பத்துக்கண்ணில் 19 செ.மீ. பாகூரில் 13.4 செ.மீ. மழை பதிவாகியுள்ளது.

கடந்த 24 மணி நேரத்தில் தண்ணீர் தேங்குதல், மரங்கள் முறிந்து விழுந்தது, மின்கம்பங்கள் சேதம் என 80 புகார்கள் பெறப்பட்டு அவை நிவர்த்தி செய்யப்பட்டுள்ளன. மாவட்ட நிர்வாகம் முழு வீச்சில் நடவடிக்கை எடுத்து பல்வேறு பகுதிகளில் தேங்கி நிற்கும் தண்ணீரை அகற்றி வருகிறது.

புதுச்சேரியில் பெய்த கனமழையால் இதுவரை 78 குடிசைகள், 31 வீடுகள் சேதமடைந்துள்ளன. கனமழை காரணமாக இதுவரை 610 பேர் பாதுகாப்பான இடங்களில் தங்க வைக்கப்பட்டுள்ளனர்.