இந்திய சந்தையில் 20,000 யூனிட்கள் விற்பனையான ரெனால்ட் கார்

ரெனால்ட் இந்தியா நிறுவனம் இந்தியாவில் சமீபத்தில் அறிமுகம் செய்த டிரைபர் எம்.பி.வி. கார் 20,000-க்கும் அதிக யூனிட்கள் விற்பனையாகி இருக்கிறது. இந்தியாவில் ரெனால்ட் டிரைபர் காரின் விற்பனை கடந்த ஆண்டு ஆகஸ்ட் மாதத்தில் துவங்கியது.

ரெனால்ட் டிரைபர் சப்-4 மீட்டர் அளவில் உருவாக்கப்பட்ட எம்.பி.வி. கார் ஆகும். இந்தியாவில் இந்த கார் கடந்த ஆண்டு ஜூன் மாதத்தில் அறிமுகம் செய்யப்பட்டு விற்பனை ஆகஸ்ட் மாத்ததில் துவங்கப்பட்டது. அந்த வகையில் இந்திய சந்தையில் டிரைபர் கார் அமோக வரவேற்பு பெற்று வருகிறது.

இந்திய சந்தையில் டிசம்பர் 2019-இல் அதிகம் விற்பனையான எம்.பி.வி. கார்களில் ரெனால்ட் டிரைபர் மூன்றாவது இடம்பிடித்துள்ளது. 2019 டிசம்பரில் மட்டும் சுமார் 5,631 டிரைபர் கார்களை ரெனால்ட் விற்பனை செய்துள்ளது. அதிகம் விற்பனையான கார்களின் பட்டியலில் மாருதி எர்டிகா மற்றும் மஹிந்திரா பொலிரோ கார்களுக்கு அடுத்த இடத்தில் டிரைபர் இருக்கிறது.

ரெனால்ட் டிரைபர் கார் சி.எம்.எஃப்.-ஏ பிளாட்ஃபார்மை தழுவி உருவாக்கப்பட்டுள்ளது. காரின் உள்புறம் டூயல்-டோன் இன்டீரியர் செய்யப்பட்டுள்ளது. டேஷ்போர்டு, ஸ்டீரிங் வீல் மற்றும் டோர் பேனல்களில் சில்வர் ட்ரிம் செய்யப்பட்டிருப்பது காருக்கு பிரீமியம் தோற்றத்தை வழங்குகிறது.

ரெனால்ட் டிரைபர் கார் 1.0 லிட்டர் என்ஜின் கொண்டிருக்கிறது. இதே என்ஜின் ரெனால்ட் க்ளியோ மற்றும் சான்ட்ரியோ போன்ற மாடல்களிலும் வழங்கப்பட்டுள்ளது. இந்த என்ஜின் 71 பி.ஹெச்.பி. பவர், 96 என்.எம். டார்க் செயல்திறன் வழங்குகிறது. இத்துடன் 5-ஸ்பீடு மேனுவல் அல்லது 5-ஸ்பீடு ஈசி ஆர் ஏ.எம்.டி. கியர்பாக்ஸ் வழங்கப்பட்டுள்ளது.

இந்தியாவில் ரெனால்ட் டிரைபர் XE  விலை ரூ.4.95 லட்சத்தில் துவங்கி டாப் எண்ட் RXZ விலை ரூ.6.49 லட்சம் என நிர்ணயம் செய்யப்பட்டுள்ளது.