ஐபிஎல் 2021- இங்கிலாந்தில் இருந்து துபாய் செல்லும் வீரர்களை 6 நாட்கள் தனிமைப்படுத்த உத்தரவு

புதுடெல்லி:

இந்த ஆண்டின் ஐபிஎல் போட்டிகள், கொரோனா பரவல் காரணமாக, கடந்த மே மாதம் 4-ம் தேதியோடு நிறுத்தப்பட்டன. முதல் சுற்று லீக் ஆட்டங்கள் மட்டுமே நடந்து முடிந்திருந்தன. 2-வது சுற்று லீக் ஆட்டங்கள், சூப்பர் லீக் மற்றும் இறுதி ஆட்டம் ஐக்கிய அரபு அமீரகத்தில் நடக்கிறது. 

ஐக்கிய அரபு அமீரகத்தில் 2-வது கட்ட ஐபிஎல் டி20 லீக் ஆட்டங்கள் செப்டம்பர் 19-ம் தேதி தொடங்குகிறது. முதல் ஆட்டத்தில் சிஎஸ்கே அணியும், மும்பை இந்தியன்ஸ் அணியும் மோதுகின்றன. 27 நாட்கள் நடக்கும் போட்டித் தொடரில் மொத்தம் 31 ஆட்டங்கள் நடக்கின்றன. 

ஐக்கிய அரபு அமீரகத்தில் வீரர்கள் 6 நாட்கள் தனிமைப்படுத்தப்பட்டு, 2 முறை கோவிட் பரிசோதனை நடத்தப்படுகிறது. பரிசோதனையில் நெகட்டிவ் வரும் பட்சத்தில் பயோ-பபுள் சூழலுக்குள் அனுப்பப்பட்டு, போட்டியில் பங்கேற்பார்கள். ஏற்கனவே சில வீரர்கள் பரிசோதனை முடிந்து பயோ பபுள் பாதுகாப்பு வளையத்தில் உள்ளனர்.

தற்போது இந்திய அணி இங்கிலாந்தில் டெஸ்ட் தொடரை முடித்துள்ளதால் அங்கிருந்து ஐபிஎல் போட்டியில் பங்கேற்பதற்காக ஐக்கிய அரபு அமீரகம் செல்ல உள்ளனர். அவர்கள் அனைவரும் ஐக்கிய அரபு அமீரகத்தை அடைந்ததும், 6 நாட்கள் தனிமைப்படுத்தப்பட்டு, அதன்பின்னர் பயோ பபுள் பாதுகாப்பு வளையத்தில் உள்ள வீரர்களுடன் இணைய வேண்டும் என பிசிசிஐ தெரிவித்துள்ளது. இதனை உறுதி செய்யும்படி அணி நிர்வாகங்களுக்கு பிசிசிஐ தெரிவித்துள்ளது.

இங்கிலாந்தில் 5வது டெஸ்ட் போட்டி ரத்து செய்யப்பட்டதால், மான்செஸ்டரில் இருந்து தங்கள் வீரர்களை சிறப்பு விமானங்கள் மூலம் அழைத்து வரும் முயற்சியில் ஐபிஎல் அணிகளின் நிர்வாகிகள் முயற்சி செய்துவருகிறார்கள். ராயல் சேலஞ்சர்ஸ் பெங்களூர் அணி நிர்வாகம், தனது வீரர்களாக விராட் கோலி, முகமது சிராஜ் ஆகியோரை துபாய்க்கு அழைத்து வருவதற்கு சிறப்பு விமானத்தை ஏற்பாடு செய்துள்ளது. அவர்கள் இருவரும் நாளை அதிகாலை துபாய் சென்றடைவார்கள் என தகவல்கள் வெளியாகி உள்ளன.